أسباب تجعل المبيت في هوستل فكرة سيئة

صحّوني من النوم الساعة ٢ بعد منتصف الليل وكانت عم تحكي معي موظفة الإستقبال في الهوستل بس أنا مش سامعها, ما فهمت شو عم بصير, ليش الحياة Silent؟؟!! بعدين تذكرت اني حاطط سدادات للأذن بسبب أصوات الشخير اللي ما قدرت أتجاهلها في الغرفة! 😅 شلت السدّادة من أذني اليمين بس كانت الحياة لسا سايلنت, حكيت للموظفة تستنى شوي لإني مش سامع, شلت السدّادة الثانية, “هلأ سامعني؟” بعد ٥ ثواني “آه سامعك, شو في؟؟”

بعد محاولات شاقة اني أفهم شو بدها (لإني كنت داخليا لسّا نايم, حتى لو عيني مفتوحة), فهمت انه في واحد بالغرفة مريض وقام بالإستفراغ على الأرض وشوي من اللي استفرغه اجا على سريري 💩 وكانت عم تحكيلي بدهم ينقلوني على سرير تاني أو يعطوني غرفة تانية, على راحتي, كان كل اللي بدي اياه اني أرجع أنام وحاولت أحكيلها, بس بعد شوية تفكير حكتلهم خلص بدي أغير السرير وفعلا غيّرته.

ضمن سنتين من السفر والنوم في أكتر من ٥٠ هوستل, كانت هاي الحادثة من أكثر التجارب إزعاجا بتصير معي. مع إنها كانت الحادثة الوحيدة من هذا النوع وما صار معي أي تجربة سيئة قبل هيك (عدا عن صوت الشخير بعض الأحيان 😴), حبّيت أحكيلكم ١٠ أسباب أخرى بتخلّي فكرة المبيت في هوستل فكرة سيئة. (إذا كنت ما بتعرف شو يعني هوستل, إقرأ هاي المقالة)

١٠ أسباب تجعل مبيتك في هوستل فكرة سيئة

١- الهوستل أرخص: يعني ستضظر لدفع مبلغ أقل لخدمة أفضل وهو شيء أولاً ينافي المنطق, وثانيا ستضطر لإستخدام النقود اللي وفّرتها لفعل نشاطات مسلّية أنت في غنى عنها! النوم أهم!!

٢- لن يتم استغلالك كسائح كما في الفنادق: لكن أنت سائح وتحب أن تحس بكونك سائح وفكرة عدم استغلالك تأخذ جزء مهم وكبير من التجربة السياحية! مثلا تخيّل انّك في هوستل وبدك خريطة المدينة, رح يعطوك اياها ببلاش!! يعني رح تبطّل تحس بقيمة الأشياء كمان! أو تخيّل بدك تطلب أكل من مطعم وتاكله بالهوستل, ما رح يمنعوك وما رح تدخل في نقاش وطوشة عن انه انت زبون ودافع مصاري ولازم ما يمنعوك وبالآخر تضطر تاكل في بوفيه الفندق وتدفع مبلغ طائل .. بالنسبة لي هذا الجزء من تجربة النزول بالفندق له نكهة خاصة مستحيل تعيشها وانت بهوستل, كما أسميها “طوشة الأكل من برا” .. وغير ذلك من الطرق التي لن يتم استغلالك فيها بالهوستل.

٣- النشاطات المجّانية: أغلب الهوستلات تقدّم عدّة نشاطات تكون مجّانية أو بأسعار رمزية. كيف هاي الجزئية سلبية؟ سهلة.. انت قضيت فترة من حياتك تجمع المال لتسافر, إذا سافرت ونزلت لهوستل وطلعت النشاطات مجانية وين رح تدفع المصاري اللي جمعتهم؟ ولا مكان! ورح تضطر ترجعهم معك على بلدك وتحس انه كل التجميع كان عالفاضي وحياتك ليس لها هدف, لذلك انزل بفندق وادفع مصاريك عالنشاطات هناك (إذا ضل معك مصاري بعد ما تدفع إقامة الفندق).

٤- الفطور المجّاني: بالرغم من السعر المنخفض للهوستل, أغلب الهوستلات تقدّم فطور مجّاني, يعني رح تروح عليك فرصة انك تفطر بمطعم! مش عارف كيف الواحد بيجيه قلب ينزل بهوستل ويفطر ببلاش وهو بقدر ينزل بفندق ويفطر بمصاري أو يروح على مطعم.

٥- الناس: رح تقابل ناس رهيبين جدا وعندهم قصص رائعة عن السفر! بالتالي للأسف ستحس انه إنت حياتك فارغة وما عندك قصص زيهم وما أبشعه من شعور, لذلك لا تنزل بهوستل تجنبا لمقابلة هدول الناس الرائعين.

الصحبة الطيبة أهم من المكان، والسعادة حقيقة فقط عندما نشاركها ❤️ جمعة مباركة 🌸 Good company in more important than good scenery, and happiness is only real when shared ❤️ #whileinindia #indiatravel #india #goodfriends #bestfriends #indialove #manali #missindia #imissindia #tbt #tgif #crazypeople #gopro #goproselfie #goproselfies

A post shared by Kasem Hato 🌎 (@ibnhattuta) on Oct 14, 2016 at 3:13am PDT

٦- جو الهوستل: الجو العام للهوستل مريح, الكل متساوي وبتقدر تحكي مع الكل وتعاملهم لطيف, حتى اللي بشتغلوا بالهوستل بتعاملوا معك كصديق وليس كعميل وبحاولوا يساعدوك كإنك صديقهم.. لكن التجربة الجميلة لازم تكون خارج منطقة الراحة وبما انه الجو العام بالهوستل مريح ما بصير تنزل فيه!

٧- المنطقة المشتركة: وجود منطقة مشتركة يتجمع فيها الجميع في وقت فراغهم, بكون فيها ألعاب, آلات موسيقية, تلفزيون, مساحة ممتازة لشخص اجتماعي حابب يتعرف على ناس جداد ويتسلى معهم,, لكن نعود للنقطة الخامسة والناس الرهيبين اللي بكونوا موجودين في هاي المنطقة.

٨- المطبخ! بأغلب الهوستلات في مطابخ بإمكانك تستخدمها لتطبخ طعامك الخاص خصوصا إذا بهمّك التوفير ويتوفّر فيها بالعادة الشاي والقهوة وبعض السناكات مجانا للنزلاء.. بس وجود مطبخ يعني وجود نار وممكن ينحرق الهوستل ويموتوا الناس اللي فيه,, انتبه, خطر الموت!

٩- الأمان: بالنسبة للأمان والخوف من السرقة, يوجد خزانات مع أقفال بأغلب الهوستلات تستطيع وضع أغراضك فيها.. وجود هاي الخزانات باخد من مساحة الغرفة وببطل في وسع للناس يتحركوا! مش قادر ألاقي إيجابية وحدة للهوستل ايه! 🙁

١٠- بعد فترة من السفر, يتحول المبيت في الهوستلات إلى أسلوب حياة أكثر من مجرّد مكان إقامة, الناس اللي بتقابلهم, القصص اللي بتسمعها, النشاطات اللي بتعملها, رح تخلّي المبيت في فندق شيء ممل. لا لأن يصبح المبيت في الفندق مملّاً, لا للهوستل!!

في كتيييير سلبيات تانية بس بدّيش أطوّل عليكم,, مين عنده سلبيات للهوستل أنا ما ذكرتها؟ احكولي في الكومنتس تحت 👇🏼

*سؤال مكرر: عادي إذا أنا بنت أنام بهوستل؟ أغلب الهوستلات عندها غرف خاصة للبنات بتخلّي الموضوع عادي حتى لبنت عربية ومحجبة

*إذا بدك تحجز هوستل بتقدر تروح على “ساعدني” وفيها خانة بحث عن الفنادق, استخدمها (إذا استخدمتها رح ييجيني عمولة على حجزك بدون ما يختلف السعر عليك 🙄)

*استنووووووا شوي, إذا عجبتكم المقالة لا تنسوا تشاركوها مع أصدقائكم! ولا تنسوا تشتركوا في المدونة ليصلكم كل جديد (الكبسات اللي تحت المقالة بتساعدكم تنشروها عالسريع بدون غلبة) ✌🏼